PATAY ang 10-anyos nga bata samtang naangol sab ang amahan human natumbahan og punoan sa kahoy ang ilang balay alas 8:40 sa gabii niadtong Dominggo sa dakbayan sa Cotabato.

Giila ang namatay nga si Jaib Dinda samtang naangol ang iyang amahan nga si Sanimbar Dinda, 41, mga molupyo sa Barangay Bagua Uno, Cotabato City.

Sa taho gikan sa Cotabato City Police Office, nasayran nga atua sa sulod sa balay ang mga biktima ug paingon na nga mangatulog.

Apan kalit lang mibundak ang makusog nga ulan ug hangin nga maoy gituohang hinungdan nga natumba ang punoan sa Acasia ug nabundakan ang balay sa pamilyang Dinda.

Patay on the spot ang bata nga sentro nga nadat-ugan sa mga sangay sa kahoy.

Samtang grabe ang iyang amahan nga nadala ngadto sa Cotabato Regional and Medical Center gumikan sa daghang bali ug bun-og sa kalawasan.

Nawala sab ang suplay sa kuryente gumikan dunay mga poste sa Colight ang naigo sa mga punoan sa kahoy nga natumba.

Nagpaabot na og hinabang si Cotabato City Mayor Cynthia Guiani Sayadi sa pamilya sa mga biktima. (Edgar E. Fuerzas)