MATI CITY, Davao Oriental -- Nagpabiling misteryo karon ang usa ka sakyanan nga nahulog sa bung-aw gumikan walay bisan usa nga sakay niini dihang napalgan pipila ka metros ang gilawmon gikan sa kalsada sa Curbada, Barangay Badas.

Sa impormasyon gikan sa Mati City Information Office, nasayran nga subay sa report sa City Disaster Risk Reduction and Management Office, usa ka awto kolor abo, dunay plaka numero ZAB 8371 ang midaro padung sa ubos nga bahin sa Curbada.

Nakurat ang mga rescuers dihang walay bisan usa ka tawo ang naa sa sulod sa maong sakyanan.

Wa sab masayri kanus-a nahulog ang maong sakyanan apan subay sa imbestigasyon sa kapulisan bag-ohay pa nahitabo ang aksidente.

Bisan usa sa mga tawo sa dapit wala nakamatikod nga dunay nadisgrasya, butang nga ilang gikatingala.

Gitaho sab sa Mati CIO nga dihang gisubay sa awtoridad ang mga duol nga mga ospital sa siyudad walay bisan usa nga na-report nga nagpatambal human nabiktima sa disgrasya. (Uban sa taho sa CIO-Mati)