MOKABAT na 23 ka mga sunog ang natala sa buhatan sa Davao City Fire District gikan bulan sa Enero hangtud ning kasamtangan nga bulan dungan sa gitawag nga Fire Prevention Month.

Adlaw nga Huwebes, Marso 7, natigayon ang ika-23 ka sunog didto sa Sparrow Street, Kabacan, Ecoland Davao CIty.

Giingong nagsugod ang sunog sa ikaduhang andana sa panimalay sa usa ka Perla Penaranda, 62-anyos.

Nakamata na lamang ang anak niini nga babaye nga natulog sa 2nd floor nga nasunog na ang ilang balay.

Gumikan kay gama sa kahoy ang balay ug dikit-dikit ang mga gambalay daling mitapon ang kalayo sa mga silingan.

Miresulta kini sa pagka-ugdaw sa unom ka panimalay ug dunay laing upat ang damaged.

Sumala ni Senior Police Officer (SFO) 2 Ramil Gillado, ang deputy chief sa investigation section sa BFP-Davao, nga electrical faulty wiring ang ilang ginalantaw nga hinungdan sa kalayo ug sa mga natigayong sunog, sagad wiring ang hinungdan sa kalayo.

Hinuon wala namatay sa hitabo diin mokabat ngadto sa P200 mil ang danyos sa maong insidente.

Nagpahimangno ang kabomberohan nga mag-igmat gayod ug makanunayon ang paghiling sa mga koneksyon sa kuryente ug dili magpataka og biya sa mga baga sa kalan. (Richy F. Nalagon)