GIKUSTODIYA na karon sa Talomo Police Station ang gikonsiderang usa ka big-time drug pusher nga maoy high-value target ug number 6 sa regional level sa drugs watchlist sa kapulisan ug sa Philippine Drugs Enforcement Agency (PDEA) sa Davao Region.

Alas 7 sa gabii, Enero 20, 2021, abtik nga mikasa og operasyon ang Talomo police sa pagpanguna sa hepe sa istasyon nga si Police Major Sean Logronio, uban sa PS3 Drugs Enforcement Unit head Police Lieutenant Rizalito Clapiz III ug sa mga kaubanan.

Malampusong nasikop ang suspek nga si Junel Rupieta Jayme, 34 anyos, ug residente sa Topaz Street, Crystal Meadows, Landmark 3, Buhangin, Davao City.

Ang buy-bust natigayon sa San Francisco Street, La Verna Hills, Phase 3, Cabantian, ning siyudad, diin mokantidad sa P160 mil ang gituohang shabu nga nakuha gikan sa posisyon sa dinakpan.

Gibutyag sa kapulisan nga taud-taod na sab nilang gipanid-an ang ilegal nga aktibidad sa suspek hangtud miabot sa punto nga mobaligya na kini, hinungdan nga ila dayong gikasa ang operasyon.

Ning kasamtangan, giandam na ang kaso nga ipasaka batok sa suspek didto sa korte. (Jeepy P. Compio)