PERTENG hubaga ug milagom ang usa ka mata nga nagpa-blotter sa San Pedro Police Station ang usa ka bayot human sumbaga sa usa ka lalaki ala una sa kaadlawon, Hulyo 10, 2022.

Ang binabaye nagpaila sa pangalan nga Michaela, 24, nagpuyo sa Barangay Baliok, Talomo District, Davao City.

Saysay niini sa San Pedro police nga niadtong Hulyo 9, nasabutan nila sa iyang ka-chat nga mag-meet sa parke atbang sa San Pedro Cathedral, ug tuod man, nag-meet sila.

Apan pipila ka oras ang milabay, napungot si Justine, 19, dihang iyang nasayran nga di diay tinuod nga babaye si Michaela kay iyang nakita nga milugwa ang condom nga dunay sud nga tubig sa bra nga maoy gihimong totoy sa bayot.

Nasayran nga sa Facebook ni Michaela, nagpaila kining babaye subay sa mga hulagway nga na-post niini, butang nga perteng gugmaha ni Justine gumikan na sab sa kaguwapa sa nahisgutan.

Nasuko si Justine pipila ka oras sa pag-angkon ni Michaela nga di siya tinuod nga babaye, hinungdan nga nasumbagan ni Justine ang nawong sa bayot usa ka higayon tumong sa mata.

Human sa hitabo, daling misibat si Justine, kinsa nag-deactivate kini sa Facebook ug gi-blocked sa Messenger si Michaela.

Walay nahimo ang binabaye, kon di ang pagpa-blotter na lang sa San Pedro Police Station.