DAVAO DE ORO -- Patay ang lalaki kinsa bisita lang sa gikainom niini nga giingong samdan sab human wala magsinabtanay didto sa Purok 6, Wao, Barangay Fuentes, Pantukan, ala 1:00 sa kaadlawon, Dominggo.

Ang biktima giila nga si Ricardo Simbajon, 57, minyo, molupyo sa Barangay Cagangganan, Banaybanay, Davao Oriental, samtang ang gitumbok nga suspek nailhan nga si Avelino Aquino Cantutay Jr., 54, minyo, minero, taga Purok 6, Wao, Barangay Fuentes.

Base sa inisyal nga imbestigasyon, alas 11:45 sa gabii, Sabado ang biktima mibisita sa balay sa suspek ug sila nagtagay sa ilimnong makahubog.

Apan sa dihang padung na unta mangatulog, nag-wild ang biktima ug gisulaya'g dunggab ang suspek gumikan sa wa pagsinabtanay apan nakapanalipod ang suspek sa iyang kaugalingon ug natigbasan ang biktima gamit ang mahait nga sundang.

Nakahiagom ang biktima og daghang samad sa kalawasan samtang ang suspek nakahiagom sab og samad dinunggaban sa bukton.

Gidali pagdala ang duruha sa Comval Provincial Hospital-Pantukan apan si Simbajon gideklarang dead on arrival samtang si Cantutay gitambalan sa samad nga natagamtaman.

Padayon pa ang imbestigasyon sa kapulisan sa pagsuwat ning balita.