SUGOD na ang biyahe sa mga bus sa Dakbayan sa Davao karong adlawa, Hunyo 1, 2020 apan usa lang ka pasada matag adlaw alang sa matag rota.

Kini maoy gipahibawo ni Mayor Sara Duterte-Carpio.

Sa paghinabi sa radyo niadtong Biyernes, Mayo 29, gikanayon ni Duterte-Carpio nga sumala sa Land Transportation Franchising and Regulatory Board (LTFRB)-Davao Region, lakip sa mga rota sa bus ang Dakbayan sa Davao ug mga destinasyon sa mga probinsiya sa Davao del Norte, Davao Oriental, ug Davao de Oro.

Ang maong mga destinasyon naglakip sa Monkayo, Nabunturan, New Bataan, Maragusan, Laak, ug Pantukan alang sa Davao de Oro; Gov. Generoso, Mati City, ug Boston sa Davao Oriental; ug Tagum, ug Talaingod sa Davao del Norte.

"Since limited lang, once-a-day lang ang trip so 'first come, first served' and sa Dcott [Davao City Overland Transport Terminal] siya," tug-an ni Duterte-Carpio sa programa sa 87.5 FM Davao City Disaster Radio.

Ang pagbalik sa biyahe sa bus sa mga probinsiya gikan sa Davao City magmarka sa unang adlaw sa modified general community quarantine (MGCQ) sa tibuok Davao Region, gawas sa Davao City, kon diin magpabilin ubos sa general community quarantine (GCQ) subay sa rekomendasyon sa Inter-Agency Task Force on Emerging Infectious Diseases (IATF-EID) hangtud Hunyo 15.

Ubos sa IATF-EID guidelines, ang lihok sa mga tawo sa mga lugar nga ubos sa GCQ o MGCQ tugtan, gawas lang sa paglulinghayaw.

Samtang si Davao City Overland Transport Terminal (Dcott) head Aisa Usop nagsulti nga ang bus terminal sa siyudad giandam na alang sa pagbalik og biyahe sa mga bus. Gani giandam na na kini kadtong wala pa gipaubos sa GCQ ang siyudad.

Gipasalig ni Usop nga ang Dcott terminal magpatuman og istriktong health measures aron nga masiguro ang kaluwasan sa mga mobiyahe taliwala sa coronavirus disease (Covid-19) pandemic. (RGL)