GIBALHIN na sa Digos City Police Office (DCPO) ang nasikop nga board member sa ikaduhang distrito sa probinsiya ug lain pang pito ka mga kauban niini, Biyernes sa gabii, Oktubre 4.

Nagpagawas na og resolusyon ang City Prosecutor's Office sa dakbayan nga ibalhin sa DCPO sila si Board Member Arvin Malaza ug mga kaubanang sila si Romeo Laugo, Audie Barsalote Jr., Jezreil Beray, Wendy Samson, Giselle Corpuz, Jake Louie Diez ug Irish Dayanap.

Subay sa maong resolusyon sa buhatan sa piskalya, giingong "indicted" ang mga suspek sa kasong syndicated estafa sa Section 315 sa Revised Penal Code human matud pa milapas sa Republic Act (RA) 8799 sa Securities Regulation Code sa Securities and Exchange Commission (SEC) ug RA 10591 o illegal possession of firearms and explosives.

Kahinumdoman nga nasikop ang mga nahisgutan sa gilusad nga ronda sa mga sakop sa National Bureau of Investigation (NBI) ang buhatan sa Kapa Worldwide Association nga nahimutang sa compound sa Muews Radio Digos nga giingong gipanag-iyahan ni Malaza.

Septyembre 16 ning tuiga, dihang kalit nga gironda sa NBI ang buhatan sa Kapa Digos human nakadawat og impormasyon nga nag-pay in pagbalik, butang nga hugot gilimod ni Malaza.

Sa wala pa gipriso, gihimo ang medical check-up sa mga suspek didto sa Davao del Sur Provincial Hospital.

Walay girekomendang piyansa ang korte sa kasong gi-atubang sa mga suspek.

Sa kasamtangan, wala sab gipagawas nga hukom ang Department of Interior and Local Government (DILG) kon unsay mahitabo sa nabakanteng puwesto ni Malaza sa Sangguniang Panlalawigan.