GITUOHANG charger sa cellphone ang mibuto kay na-overcharged hinungdan nga mikalayo ug miugdaw sa dul-an baynte singko ka mga panimalay sa Purok 2, Brgy. 37-D, Poblacion, dakbayan sa Davao Lunes sa hapon, Marso 25.

Sa inisyal nga imbestigasyon sa Bureau of Fire Protection (BFP) sa Davao City Fire District nasayran nga nagsugod ang kalayo sa panimalay sa usa ka Alma Cañete ug gilayong mikatay sa kasikbit nga mga balay sanglit gama sa mga light materials.

Gibutyag sab sa usa ka alyas Inday, residente sa lugar nga samtang nagkaon sila, kalit na lang midako ang kalayo nga gikan sa panimalay ni Alma.

"Daghan nag-ingon nga dunay mibuto, tapos miingon dayon tong naa ila Alma, nga 'hala ang charger seguro to," saysay ni alyas Inday.

Miabot og duha ka oras ang pagpalong sa kalayo diin walay natala nga nakabsan sa kinabuhi sa maong hitabo, samtang ang mga biktima gipahiluna na sa City Social Services and Development Office (CSSDO) sa Brgy. 37-D gym. (Richy F. Nalagon)