SUBLI nga nanganti ang mga sakop sa Criminal Investigation and Detection Group Davao City Field Unit (CIDG-DCFU), nga wala sila'y pakyason ug dakpon gayud ang mga tawo nga nagpataya og last-2 digits.

Kini ang gibutyag sa CIDG-DCFU subay sa direktiba sa CIDG-Central Office nga walay palabyon nga mga last-2 digits ushers, administrator ug bisan mga financiers, kini pangdakpon gyod.

Sa pinaka-ulahing datus sa CIDG-DCFU, usa ka Venancio Bacalla Vilbestre, ang nasikop sa Seaside 2, Barangay Matina Aplaya, Davao City, Huwebes sa hapon, Disyembre 13.

Nakumpiska gikan kaniya ang pusta nga P450, cellphone ug uban pang gamit sa pagpataya sa maong sugal.

Mag-atubang ang maong dinakpan og kaso didto sa korte. (RFN)