MAGSAYSAY, Davao del Sur -- Gisugdan na sa lokal nga gobyerno ang clearing operation sa ilang munisipyo human nahugmak, ilabi na nga anaa sa sud niini, human mitay-og ang upat ka sagunsong linog sa ulahing bahin sa 2019.

Gamit ang backhoe, gisugdan paglimpyo ang palibot sa building human nagkatag ang daghang mga semento ug uban pang debris gikan sa ibabaw sa munisipyo kagahapon sa buntag.

Sumala ni Anthony Allada, tigpamaba sa lokal nga gobyerno, gihimo ang clearing operation isip pagpangandam aron ayuhon ang nahugmak nga mga bahin sa munisipyo.

Nasayran nga nagpabiling nagbarog ang mga estruktura sa building timailhan nga lig-on gihapon ang munisipyo ug mga debris lamang sa sud maoy nangahagbong human mitay-og ang kusog nga mga linog nga anaa sa kapin magnitude 6 ang gikusgon.

Dungan niini, padayon sab nga giatiman sa lokal nga gobyerno ang mga biktima sa linog gikan sa nagkadaiyang mga barangay diin ang uban nagpabilin pa sa mga evacuation centers.

Maningkamot ang lokal nga gobyerno nga mapaspasan ang paghan-ay sa mga rekisitos aron makapalit na sila og dugang mga relocation sites nga maoy kapuy-an sa liboan ka mga pamilyang nawad-an og panimalay.

Di ikalimod nga nagpabilin pa sa dughan sa mga biktima ang kakulba sa nasinati nga linog human makasinati gihapon sila og hinay nga mga pagtay-og.

Hinuon, wa pay gipaguwang pahayag ang mayor sa lungsod kon unsa ang plano sa pagtukod og bag-ong munisipyo ug pila ang gitakdang badyet niini. (Orlando B. Dinoy)