GIBUTYAG sa Davao City Social Welfare Development Office (CSWDO) nga duna na lay gamay nga mga makililimos sa kadalanan, partikular mga miyembro sa komunidad sa Badjao, naglatagaw sa siyudad.

Si Jackie Roble, center head sa Quick Response Team for Children's Concerns/Kean Gabriel sa CSWDO, nagsulti nga ubang mga kaigsuonan Badjaos nibalhin na sa pagpamaligya o paglibud og mga paninda ug gamay na lang ang nahabilin nga naglatagaw sa kadalanan nga nangilimos og sinsilyo o pagkaon.

“Tungod man gud pud na dili sila makapangisda, mao nang manganha sila sa dalan but actually nag-lessen na siya,” butyag ni Roble atol sa iSpeak media forum niadtong Hunyo 1.

Gisulti ni Roble nga mga Badjaos way permanenteng balay apan kadtong mga Badjaos nga naglibud ug naglatagaw sa kadalanan sa poblasyon sa Davao City gikan sa Matina Aplaya ug Bucana.

Dugang pa niya nga nakasugat sab sila og mga hagit kon diin ang komunidad sa Badjao nagbaligya sa ayuda sa gobyerno o food packs aron nga ipalit og alak o uban pang bisyo apan ang CSWDO nilihok na niini pinaagi sa ilang Street Education Program.

Pinaagi sa maong programa, mga sakop sa komunidad sa Badjao mopailawom og seminar ug oryentasyon ug gihatagan og tabang panginabuhi. Nalista sab sila ubos sa "masterlist" sa lokal nga panggamhanan.

“(Under the program), wala gyud sila (Badjaos) dapat sa streets. Ginatagaan pud sila og lecture and they are encouraged to be immunized to ensure their health and wellness,” pasabot ni Robel. (ICM)