DAVAO DEL SUR -- Suportado sa kapolisan ning lalawigan ang Anti-terrorism Bill sa nasyonal nga gobyerno sa tinguhang hingpit nga mapakgang ang mga teroristang kalihukan.

Mipadayag sab sa ilang pag-kondena sa komunistang kalihukan ang Davao del Sur Police Provincial Office (DSPPO) ug nanawagan sa katawhan sa probinsya nga suportahan ang maong balaudnon, aron hingpit nga mapukan ang mga kalihukan sa teroristang grupo aron di na masubli ang nabaniog nga “Rano Massacre.”

Matod ni Police Colonel Alberto Lupaz, director sa DSPPO, nga kinahanglang mahatagan og hustisya ang mga biktima sa mga rebeldeng New People’s Army.

Sa paghinumdom sa ika-31 ka tuig nga Rano Massacre niadtong Hunyo 25, miduyog ang DSPPO sa komerasyon sa ngilngig nga kasaysayan didto sa Sitio Rano sa Barangay Binaton.

“I urge the public to support the Anti-Terrorism bill, para kining mga terorista mapaslak nato sa bilangguan ug matagaan og hustisya ang mga biktima sama sa Rano Massacre nga dili na mausab,” tataw ni Lupaz.