NAKIG-DAYALOGO ang mga kadagkoan sa Quezon Boulevard Muslim-Christian Neighborhood Associations (QBMCNA) ngadto sa mga opisyal sa Presidential Commission for the Urban Poor (PCUP) sa Davao City Martes aron di sila demolison sa ilang dapit sa Quezon Boulevard, Salmonan, Barangay 26-C Poblacion, siyudad sa Davao.

Si Omar Batara, presidente sa QBMCNA, nagpasibaw sa ilang mga kaagi sa luna gikan sa ilang pagpuyo niini 65 ka tuig na ang milabay.

Giingon nila atubangan sa mga opisyal sa PCUP nga respetuhon ang ilang mga katungod ug kung mamahimo mobayad nalang sila og binulan sa yuta aron di lamang sila mapapahaw sa dapit.

Nanghinaut sab ang mga residente nga i-award nalang unta ang luna kanila gikan sa kadugayon sa ilang pagpuyo sa lugar.

Gisaysay sab ni Vergie Gonzales, presidente sa Lizada-Brgy. 26-C Homeowners Associations, nga bisan si kanhi Davao City mayor ug karon Presidente Rodrigo Duterte nasayod sa istorya sa dapit nga usa lamang ka tubigan.

"Sa pag-demolis sa una sa pipila ka block sa dapit, mismong si Davao City Mayor ug karon Pres. Duterte ang miingon nga nakabalo siya sa istorya sa luna, pero bugtong korte lamang ang nasayod kinsay nanag-iya niini," ingon ni Gonzales.

Una niini, daan nang nagpahibalo si Davao City Mayor Sara Duterte-Carpio ngadto sa mga residente nga respetuhon ang hukom sa korte diin mohatag na lang siya og abogado sa mga residente alang sa ilang buot nga ipaklaro.

Bisan si Davao City Vice Mayor Bernard Al-ag nagsulti na sab nga wala nay mahimo ang lokal nga kagamhanan sa dakbayan kundi ang pagtabang na lang sa kapulisan sa tunhay ug malinawon nga demolisyon.

Sa bahin sa Davao City Police Office, nahan-ay ang mga pulis ug ang ilang mga himan panagang ugaling dunay tensiyon nga mahitabo.

Suma pa ang kapulisan kung moingon na ang tag-iya sa maong luna nga ipahigayon na ang demolisyon luyo sa migula nga writ of demolition gikan sa korte nga nagpamatuod nga duna gayu'y nanag-iya sa yuta.

Ang demolisonon nga luna mosukod sa 3,515 metros kwadrado nga gitukoran sa dul-an 200 ka mga panimalay.