DAVAO DEL SUR -- Tungod sa padayong pagsaka sa kaso sa Covid-19 sa Digos City, si Mayor Josef Cagas gilayong mipagula og guidelines nga ipailawom ang siyudad ubos sa general community quarantine (GCQ) gikan Hunyo 14 ngadto Hunyo 27, 2021.

Subay sa maong quarantine qualification, ipatuman ang "Mandatory Stay at Home" ug "Minimum Health Protocols."

Subay sa direktiba sa mayor, ang tugutang makagawas kadto lamang essential ang katuyoan.

Ang mga nag-edad og 18 anyos paubos ug sobra 65 anyos, dunay immunodeficiency, comorbidity ug ubang problema sa panglawas di mamahimo nga mogawas, kana lang kung gikinahanglan nila nga mo-avail sa serbisyong medikal ug trabaho.

Subli sab nga nagpahinumdom ang mayor sa pagsuot kanunay og face mask ug face shield kung mogawas sa panimalay, lakip na ang "No Provincial QR code o Digos CCTS, No Transaction Policy."

Kabahin sa GCQ status, ang curfew nga sugdan sa alas 8 sa gabii ngadto alas 5 sa buntag.

Tanang malls manira sa takna nga alas 7 sa gabii, apan ang mga ospital, pharmacy, gasoline station ug uban pang essential ang trabaho mamahimong maka-operate 24/7.

Hugot sab nga ipatuman ang pagtsek sa matag mosud ug gawas sa Digos diha sa mga gimuntar nga checkpoints.

Gipahimangnoan ang publiko nga motuman sa mga rekisitos subay sa kwalipikasyon ug makigbulig sa paningkamot sa gobyerno kontra Covid-19. (Jeepy P. Compio)