DIGOS CITY -- Usa ka opisyal sa Department of Science and Technology (DOST) nagbutyag nga angayang mag-amping ang publiko sa takna nga mohapak ang kusog nga linog sa dakbayan tungod sa kahumok sa yuta.

Si Vicente Dangangon, pangulo sa DOST Provincial Office sa Davao del Sur, nagbutyag nga delikado ang pagtukod og tag-as nga mga istruktura kon dili mosubay sa building code standards.

Gipaguwa ni Dangangon ang pahayag human sa nahitabong magnitude 5.6 nga linog didto sa silingang probinsiya sa North Cotabato diin nakaapekto sab sa probinsiya.

Matud sa opisyal nga ang si bisan kinsa nga motukod og high-rise buildings angayang motuman sa Building Code of the Philippines aron malikay sa danyos sa propedad ug kinabuhi panahon nga mohapak ang di matagna nga linog.

Sumala ni Dagangon nga ang urban center sa siyudad anaa sa flat plane ug humok nga balasong yuta.

Gipahimangnoan sab niini ang publiko nga kanunay mag-amping sa takna nga moabot ang kalamidad.

Sa kasamtangan, mga tag-as nga building sa dakbayan anaa lamang sa tulo ngadto upat ka storey apan adunay gisugdang konstruksiyon sa usa ka hotel nga moabot sa 8-storey.

Ang mga tunghaan sa urban areas anaa sa duha ngadto unom ka storey.

Samtang ang gisugdang konstruksiyon nga P200-milyones nga City Hall sa dakbayan anaa sa upat ka andana ug gilaumang mahuman sa tuig 2021.