COTABATO CITY -- Pasakaan og kaso nga paglapas sa Republic Act 10591, o Illegal Possession of Ammunition, ang usa ka drayber nga nadakpan sa mga pulis nga nagdala og mga bala alas 2:00 sa hapon, Lunes, sa probinsiya sa Maguindanao.

Giila ang suspek nga si Junel Jiminez, 42, minyo, ug molupyo sa General Santos City.

Sumala kang Maguindanao Provincial Police Office Director Colonel Jibin Bongcayao nga sakay si Jiminez sa gimaneho niya nga Toyota Hilux pick up gikan sa Barangay San Isidro, Pagadian City nga paingon unta sa siyudad sa Heneral Santos.

Pag-abot sa suspek sa checkpoint sa mga pulis sa Barangay Pinantao, Parang, Maguindanao nasiplatan sa mga awtoridad ang karga niya nga 654 nga bala sa M14 rifles nga gisulod og karton.

Walay napakita nga mga papeles si Jiminez sa dala niya nga mga bala hinungdan nga gidakop dayon siya sa mga pulis.

Kahinumdoman nga daghang mga bala ug armas na ang nakompiska ang mga sakop sa Maguindanao PNP sa ilang area of responsibility.

Sa pagkakaron, ang suspek gibalhog na costudial facility sa Parang Municipal Police Station samtang padayon nga giimbestigahan. (Edgar E. Fuerzas)