COTABATO CITY -- Padayon pang gisubay sa kapulisan sa South Upi Municipal Police Station didto sa Maguindanao Province ang pagkamatay sa usa ka tawo ug pagkasamad sa lain pang usa human nga mibusikad ang improvised explosive device (IED) kilid sa kalsada.

Nahitabo ang pagbusikad alas 5:45 sa buntag, Martes, Enero 26, kung diin ang napatay giila nga si Alberto "Panong" Delos Santos, samtang ang angol nga wa panganli ug molupyo sa Barangay Purikay, Lebak, Sultan Kudarat.

Sumala kang South Upi Mayor Reynalbert Insular nga mibusikad ang IED kilid sa national highway sa Barangay Romangaob sa maong lungsod.

Tungod sa kakusog sa pagbuto, naigo ang mga biktima nga sakay sa motorsiklo nga miagi niadtong mga orasa.

Patay on the spot si Delos Santos nga naigo sa ulo ug likod samtang naangol ang iyang angkas nga nadala sa balay tambalanan.

Grupo sa Bangsamoro Islamic Freedom Fighters ang gitudlo nga mga suspek sa pagpamomba. (Edgar E. Fuerzas)