WALAY kabutangan sa pagpangayo og pasaylo sa drayber sa trak nga nalambigit sa disgrasya niadtong Sabado, Mayo 8, 2021, nga gikaangol sa gidaro niini nga kotse ug gikamatay sa usa ka delivery rider nga nagsakay sa motorsiklo didto sa Crossing Magtuod, Diversion Road, Davao City.

Ang drayber nga si Clemente Mugato, hamtong ang pangedaron, nagbutyag nga nawad-an na sila og preno hinungdan nga gibangga na lang niya kini sa poste.

Atol sa disgrasya, nakasugat niini ang usa ka kotse ug motorsiklo hinungdan nga maayong pagkadaro sa mga nahisgutan.

Dead on the spot ang drayber sa motorsiklo samtang samaron ug anaa sa ospital ang drayber sa kotse.

Dugang sa drayber nga kung wala niya gibangga sa poste, daghan hinuon ang maangol kung mopaturatoy lamang siya sa kalsada.

Dason niya nga walay si bisan kinsa nga motuyo sa ingon niadto nga hitabo, butang gisubay sab sa kuha sa video sa dashboard cam sa usa ka netizen nga si Vidz Alcantara.

Makita nga mihaguros og dagan ang trak nga hapit pa kining mibangga sa unang nakasugat nga nakita sa video.

Luyo sa disgrasya, nasagmuyo hinuon pag-ayo ang pamilya sa naangol nga nagmaneho sa kotse sanglit giingong nawala na ang P100,000 nga anaa sa sling bag niini.

Nasayran nga atol gayod sa disgrasya nga wala pay mga pulis ug paramedics team sa Central 911, naay tawo nga puwerteng dalia nakaduol ug nagpailang sakop sa media.

Gikuha ang sling bag sa biktima ug nagbutyag nga naa siyay grupo nga andam motabang sa pagpahiluna kaniya.

Dihang gisalig ang sling bag, P20,000 na lang ang nauli niini human unang nabandilyo sa radyo nga nawala ug dunay nagkuha sa bag sa biktima nga dunay daghang kuwarta.

Si alyas Mario nga usa kuno nga taga Agdao, Davao City nagpaila nga miyembro sa usa ka civic organization ug miingon nga siya ang gilayong mipunit sa bag kay basin mapunit sa uban nga dili matinud-anon.

Giingon niini nga wala gayod siya nanghilabot sa kuwarta nga anaa sa sling bag, diin bisan pa man niini paimbestigahan gihapon siya sa mga kabanay sa biktima.

Sa kasamtangan ang drayber sa trak anaa karon sa buhatan sa Talomo Police Station samtang giandam ang posibleng kaso nga ipasaka kaniya didto sa korte. (Jeepy P. Compio)