KIDAPAWAN CITY - Magpahigayon ang Philippine Drug Enforcement Agency (PDEA) Soccsksargen og revalidation sa mga giingong drug-cleared barangay sa rehiyon.

Gibutyag ni Kath Abad, tigpamaba sa PDEA-Soccsksargen nga buot nila nga susihon og madetermina ang matag barangay sa hisgutanan sa ilegal nga druga, lakip na ang pagsunod sa mga rekisitos sa drug-clearing program.

Kinahanglan nga subling masusi ang naasoy nga mga barangay nga kaniadto pang 2017 hangtud 2018 gideklara nga drug-cleared.

Nahibaloan gikan kang Abad nga 932 sa 1,158 barangays sa rehiyon nadeklara nang drug-cleared samtang 195 sab ang gikonsidera nga drug-affected ug 22 ang unaffected.

Kini subay sa assessment sa regional oversight committee nga gipangunahan sa PDEA-Soccsksargen kon diin co-chair ang Department of the Interior and Local Government.

Mga miyembro niini mao ang Department of Health ug Philippine National Police.

Ang pag-revalidate himuon tungod kay nakadawat og taho ang PDEA-Soccsksargen nga pipila ka mga barangay nga una nang gideklarang drug-cleared, duna na say namalik sa pagpayuhot og gidiling druga. (Edgar E. Fuerzas)