NAPUHAG sa kapulisan sa Talomo Police Station ang usa ka gituohan drug den nga miresulta sa pagkasikop sa duha ka mga suspek alas 10 sa buntag Enero 14, 2021 didto sa Purok 28, Barangay Baliok, Puan, Davao City.

Mga dinakpan mao sila Alejandro Alfeche Jr., alyas Totong, kinsa gikonsidera nga top 10 sa regional level sa mga drug personalities; ug ang kauban niini nga usa ka Joel Quinain, pulos hamtong ang pangedaron ug molupyo sa dapit samtang nakasibat ang usa ka alyas Bulldog.

Gipangunahan ang operasyon sa Talomo police ubos sa superbisyon sa hepe nga si Police Major Sean Logronio.

Gilayong mihimo og plano ang Police Station 3 Drug Enforcement Unit nga gipangunahan nila Police Lieutenant Cesar Aaron Robles ug Police Lieutenant Rizalito Clapiz III, uban sa mga miyembro sa Regional Special Operations Group (RSOG)-Davao nga gipangunahan ni Police Lieutenant Colonel Ronald Lao.

Atol sa operasyon, naatlan pa nga nag-pot session ang mga nahisgutang suspek diin nakuha sa ilang posisyon ang mga pakite sa gituohang shabu, ug mga drug paraphernalia.

Giproseso na sa kapulisan ang kaso nga ipasaka batok sa mga dinakpan didto sa korte.