MOKANTIDAD sa P270 mil ang gituohang shabu human napuhag ang usa ka gituohang drug den sa Purok Aquarius, Barangay Visayan Village, Tagum City, alas 8:30 sa gabii, Huwebes, Marso 18, 2021.

Sa impormasyon gikan sa Philippine Drugs Enforcement Agency (PDEA)-Davao Region, ang suspek mao si Israel Labang Barabad, alyas Ace, 34 anyos, nagpuyo sa dapit kinsa maoy subject sa buy-bust operation.

Wa magdahom ang PDEA nga nahimo na diay nga drug den ang panimalay sa suspek diin naaktuhan sab ang lima ka mga parokyano niini.

Daghang pakite sa gituohang shabu ang nakumpiska sa awtoridad ngadto sa suspek nga mobalor sa P270 mil, mga drug paraphernalia ug marked money.

Sumala sa PDEA nga taud-taod na nilang gihup-an ang aktibidad sa suspek hinungdan nga miabot sa punto nga mibaligya na kini og shabu sa nagtakuban nga PDEA agent.

Sa kasamtangan, ang suspek ug ang laing lima ka parokyano gipangbalhog sa selda samtang giandam ang posible nga kaso nga ipasaka batok kanila didto sa korte.