MAGKADAGHAN na ang ma-test matag adlaw gumikan sa pipila ka adlaw mo-operate na ang mga private testing facility sa coronavirus disease (Covid-19) gikan sa ilang pagkuha og accreditation.

Ang Davao City One World Diagnostic Center Inc. mao ang latest private testing facility nga accredited alang sa Covid-19 ug ang Southern Philippines Medical Center (SPMC) nga mokaya og 300 ka mga tawo sa pag-test.

Si Johann Go, sales representative sa Davao One World Diagnostic Center Inc., nagbutyag nga sa karon, ang center makaakomodar pa lamang og 200 test matag adlaw samtang naghulat nga nahatud ang dugang real time polymerase chain reaction (RT-PCR) machine.

"When the machines are here, we can accommodate between 1,000 and 1,200 tests per day," ingon niya.

Niadtong Lunes, gibutyag ni Davao City Mayor Sara Duterte-Carpio nga nakapasa sa five-stage accreditation sa Department of Health (DOH) ang nasampit nga mga private facility hinungdan nga operational na kini.

"Duha na kabuok ang atoang Stage 5, meaning pwede na ni sila mag -operate. Ang isa is ang SPMC, mao ni ang sa sinugdanan pa lang, and dunay nadungag ang Davao One World Diagnostic Center Inc," ingon ni Duterte-Carpio.

Dugang sa mayor nga ang laing duha ka pasilidad mao ang Davao Doctors Hospital ug ang DOH Tuberculosis Center nga anaa pa karon sa third stage sa accreditation.

Nasayran sab nga ang Los Amigos Health Center naghulat nalang alang sa approval permit aron mapanday ang testing facility. Hulyo ning tuiga nakatakda nga mabuksan. (Jeepy P. Compio/CIO)