COTABATO CITY -- Patay ang usa ka empleyado sa Department of Agriculture (DA)-ARMM sa pagpamusil alas 5:45 sa hapon niadtong Sabado, Disyembre 15, sa siyudad sa Cotabato.

Giila ang biktima nga si Bayan Angkad Blah, 47-anyos, minyo ug molupyo sa Purok Malagapas, Barangay Rosary Hieghts 10.

Gibutyag ni Cotabato City Police Director Senior Superintendent Rolly Octavio nga samtang pasakay ang biktima sa iyang kotse uban ang iyang pamilya gikan nangaon sa karinderya sa Malibacao Street, Barangay RH-4, kalit lang mibutho ang duha ka wala mailhing tawo ug gipusil kini gamit ang kalibre .45 nga pistola.

Abtik sab nga miikyas ang mga namusil sakay sa motorsiklo paingon sa hilit nga dapit sa dakbayan sa Cotabato.

Naigo sa iyang tiyan ug dughan ang biktima og suwerte nga walay nasamdan ang iyang pamilya.

Gidala si Blah sa mga nagrespondeng pulis sa Notre Dame Hospital apan pag-abot og tulo ka oras nakabsan kini sa iyang kinabuhi.

Selos sa trabaho o personal nga atraso ang gitan-aw sa mga otoridad nga motibo sa pagpamusil ug padayon nila kining giimbestigahan. (Edgar Fuerzas)