DEAD on the spot ang usa ka ex-army human pusila sa wa pa mailhing mamumuno sa Upper Piedad, Barangay Marapangi, Toril District, Davao City Huwebes sa gabii, Nobiyembre 18, 2021.

Si Police Major Michael Uyanguren, hepe sa Toril Police Station, nag-ila sa biktima nga si Joey Cabuyadao Dumlao, 50, minyo ug nagpuyo sa Purok 8, Marapangi, Toril District.

Una niini, nananghid ang biktima nga mopalit og pagkaon sa Toril Poblacion, apan dangtan og pipila ka minuto, nasayran na lang sa kabanay nga gipusil ang biktima.

Gisaysay sa asawa sa biktima nga si Nympha nga ang iyang bana dunay tago nga relasyon sa usa ka babaye.

Personal nga bangi ug giingong tungod sa relasyon ang gitan-aw karon sa kapulisan nga motibo sa krimen.

Ang kapulisan nakahipos og usa ka basiyo sa bala sa kalibre .45 nga pistola sa crime scene nga maoy gigamit sa pagpamusil.

Ang patay nga lawas sa biktima gidala ngadto sa Angel Funeral Parlor samtang ang kapulisan padayon nga naghimo og imbestigasyon sa krimen.