NAKASIGNIT ang Davao City Covid-19 Task Force og mosumada og 2,168 ka mga masinupakon sa mandatory nga pagsul-ob og face masks sa dakbayan sa tibuok Marso 2022.

Gitug-an ni Response Cluster head Alfredo Baloran sa suwat pahayag nga ang mga badlungon nga indibiduwal nakalapas sa City Ordinance 0307-20, nga nagmando sa pagsul-ob sa tanang panahon og face masks sa publiko.

Sa 2,168, ang ikalima nga semana nakatala og pinakaubos nga ihap sa nangadakpan nga 206. Gikan sa 429 nga nadakpan sa unang semana, misaka ang ihap ngadto sa 579 sa ikaduhang semana unya mihagsa ngadto sa 543 ug 411 sa ikatulo ug ikaupat nga semana sa maong han-ay.

Ang dakbayan padayon nga nag-isyu og citation tickets ngadto sa di mosul-ob og face mask sukad nga gipatuman ang ordinansa niadtong Hulyo 7, 2020 bisan pa kon ang siyudad gipailawom sa mas lugak nga Alert Level 1 sukad Marso 1.

"Continuous naman gud ni siya because naa ta'y city ordinance nga mandatory wearing of face masks. Ang uban aning nadakpan naa sa social gatherings, ang uban sa public places makita. Ang uban ani ang CTTMO makadakop, usually sa public utility vehicles," tug-an ni Baloran.

Sumala ni Baloran nga bisan og gilugwayan ang pagpailawom sa Davao City sa Alert Level 1, kinahanglan gihapon nga ang minimum public health standards (MPHS) istriktong ipatuman ug obserbahan sa tanang panahon.

Apan ang mandatory pagsul-ob og face mask ug ang kanunay nga paghugas sa kamot mao lay gipabilin sa lokal nga panggamhanan sa Davao pinaagi sa Executive Order (EO) No. 11, Series of 2022. Ang EO naglibkas sa social distancing taliwala sa pagbukas sa ekonomiya kon diin ang mga establisemento ug buhatan sa siyudad nagpatuman sab sa "full capacity and fully operational."

Naglaum siya nga naa o wala ang mga tigpatuman sa sumbanan, Dabawenyos motuman sa pagsul-ob kanunay sa face mask ug ang paghugas sa ilang mga kamot aron maprotektahan ang kaugalingon sa kagaw. (Uban sa taho sa CIO)