WA MOSALIR ang plano sa usa ka babaye nga ipalusot sa sulod sa selda sa Digos City Police Station (DCPS) ang usa ka sachet sa gituohang shabu human nasakpan sa duty guard alas 12:40 sa udto, Martes, Septiyembre 22, 2020.

Gibutyag ni Lieutenant Colonel Vici Anthony Tababa, hepe sa DCPS, nga ang suspek nailhang si Rosemarie Labajo, 47, minyo, vendor ug molupyo sa Purok Gemelina, Barangay San Miguel ning dakbayan.

Si Tababa nitataw nga usa sa mga polisiya sa ilang istasyon mao ang makuting paghiling sa tanang butang nga ipasulod sa prisohan mao nga dihang gihiling ang dalang food pack ni Labajo, nadiskubre ang pakite sa shabu nga mobalor sa kapin P5,000.

Padung untang ihatud sa suspek ang pagkaon ngadto sa person deprived of liberty (PDL) nga si alyas Aldemer.

Apil sa nasakmit gikan kaniya mao ang mga drug paraphernalia nga nakasulod sa ilawom sa food packs.

Gumikan sa mga ebidensiyang narekober sa kapulisan, si Labajo gipadlak sa prisohan.

Gihikay gilayon sa kapulisan ang kasong paglapas sa Republic Act 9165 kun Comprehensive Dangerous Drugs Act of 2002 batok sa dinakpan.