GIBUTYAG sa Southern Philippines Medical Center (SPMC) nga usa ka food delivery runner ang nagpositibo sa novel coronavirus (Sars-CoV-2) atol sa confirmatory test.

Si SPMC chief Dr. Leopoldo Vega, nagkanayon nga ang FoodPanda worker nasusi nga positibo atol sa real-time reverse transcription polymerase chain reaction (RT-PCR) test, nga mao'y maka-detect sa Sars-CoV-2, ang pathogen nga mao'y hinungdan sa sakit nga corononavirus disease (Covid-19).

Unang nag positibo ang food delivery runner pinaagi sa rapid test. Gisalang kini sa laing confirmatory test ug diha nasuta nga nataptan kini sa Covid-19.

"He's positive with RT-PCR. [He is] still admitted," butyag ni Vega.

Kasamtangan nga gipahiluna ang pasyente sa Queensland isolation facility nga gidesinyo alang sa mga pasyente nga duna'y gamay nga mga simtomas.

Dugang ni Vega nga ang asymptomatic nga pasyente karon hinay-hinay nang naayo ug gitakda og lain pang test aron nga masusi kon "clear" na ba siya gikan sa viral disease una siya tugtan nga mobalik sa ilang balay.

Sayo niini sa paghinabi sa radyo, gisulti ni Davao City Mayor Sara Duterte-Carpio nga ang lokal nga panggamhanan naglakip sa mga food delivery runners sa dakbayan alang sa "Covid-19 case finding" nga paningkamot.

Ilabi na nga nahalobilo sila sa daghang mga indibiduwal nga gikonsidera nga posibleng carrier sa kagaw.

Nagpahimangno ang mayor ngadto sa publiko kinsa nagpahimulos sa food delivery services nga mopraktis og safety measures sama sa kanunay nga paghugas sa ilang mga kamot human madawat ang mga pagkaon gikan sa gawas sa ilang balay, sa kahadlok sa posibleng pagkontamina sa ilang mga gi-order.

Dugang pa usab ni Vega nga posibleng nataptan ang pasyente sa coronavirus samtang gihimo niini ang iyang trabaho.

“Probably (he got it while doing delivery). I think they were all tested for rapid tests and he turned out to be positive,” Vega said.

Ilawom sa enhanced community quarantine, gitugutan ang delivery services. Ang maong mga serbisyo kusog ug demand sa mga Dabawenyo tungod kay limitado ang lihok ug paggawas sa mga tawo sa ilang panimalay nga alang lamang sa mga importanteng rason sama sa pagpalit ug pagkaon ug tambal.