GIIMBESTIGAHAN na karon sa Davao City Police Office (DCPO) paunsa nakasulod ang gabas sa puthaw sa selda sa Sasa Police Station nga maoy hinungdan nga nakasibat ang tulo ka mga piniriso Biyernes sa kaadlawon, Hunyo 17, 2022.

Tungod niini, girelibo ang station commander sa Sasa police nga si Police Major Alberto Abella, kinsa gihulipan ni Police Major Jose Rodrigo Mendoza pagka Hunyo 20.

Atol sa Armed Forces of the Philippines-Philippine National Police (AFP-PNP) press conference Miyerkules, Hunyo 22, 2022, gikumpirma ni Police Major Ma. Theresita Gaspan, spokesperson sa DCPO, nga tulo ka mga piniriso ang nakasibat.

Sumala ni Gaspan nga hinay-hinay nga gigabas sa tulo ka mga priso ang rehas sa prisohan, hinungdan nga nakasibat sila.

Wala sab namatngonan sa mga kaubanang priso ang pagkabas gumikan hilom kaayo ang paggabas ug nangatulog na sab ang mga kaubanang priso.

Giingon ni Gaspan nga padayon nilang giimbestigahan ang jailer kon paunsa nakasulod ang gabas, diin pahamtangan og silot kung mapamatud-an kung duna kini pagpasagad.

Ang tulo ka mga nakasibat pulos dunay mga kasong pagsupak sa Republic Act 9165 o Comprehensive Dangerous Drugs Act of 2002.

Nakigkoordinar na ang kapulisan sa mga pamilya sa mga suspek sa ilang gilusad nga hot pursuit operation.