BATANG Piapi, Boulevard Davao City ang nahimo nga bag-ong acting station commander sa Sta. Ana Police Station human gihulipan si Police Major Michael Uyanguren nga tua na gibutang nga bag-ong acting nga hepe sa Toril Philippine National Police (PNP).

Sa impormasyon gikan sa Davao City Police Office (DCPO), si Police Major Benkalin Baluan ang bag-ong hepe sa Sta. Ana PNP kinsa maoy gikan naggunit sa kadumalaan sa Mobile Patrol Unit sa DCPO.

Si Major Baluan, garbo sa Piapi Boulevard kinsa nahimong deputy station commander niadtong 2018 sa San Pedro Police Station.

Ang mihulip sa Mobile Patrol Unit mao si Police Lieutenant Colonel Ronald Lao, kinsa maoy dugay nang migunit sa Talomo Police Station isip hepe nga gipulihan ni Major Sean Logronio, ang deputy commander niini, isip acting nga station commander.

Gipulihan ni Major Uyanguren si Police Major Jason Baria nga maoy kanhi spokesperson sa Police Regional Office-Davao Region kinsa gibalik na sab kini karon sa region nga gi-assign sa Regional Personnel Holding and Accounting Unit.

Sumala sa DCPO, usa kini ka regular nga movement alang sa mga station commanders aron kahatagan og lugar ang ilang promosyon.

Ang turnover sa tulo ka istasyon gisaksihan sa mga lider sa komunidad ug gipangunahan sa director sa DCPO, Colonel Kirby John Kraft, nga nahitabo niadtong Huwebes, Septyembre 17, 2020.