PATAY na nga napalgan sa mga kabanay ang usa ka 24-anyos nga lalaki dihang naghikog kay gibulagan sa iyang kapuyo.

Ang insidente nahitabo Miyerkules sa gabii, Mayo 1, didto sa Barangay Indangan, Buhangin District, Davao City.

Giila ang biktima nga si Richard (bansagon gipatago sa kabanay), usa ka laborer.

Sumala pa nga napalgan nalang ang biktima sa iyang igsuong lalaki sulod sa kuwarto nga nagbitay gamit ang bakus nga gihigot sa liog dayon gitali sa bongbong.

Ang mga kabanay nagbutyag nga halos mag usa ka semana nang nasubo ang biktima ug magpunay nalang kini’g istambay sud sa kuwarto gumikan kay gibulagan siya sa iyang kaipon.

Dalhon pa unta sa ospital ang biktima apan gideklara sa miresponde nga mga medical team gikan sa Central 911 nga wala na’y kinabuhi ang maong lalaki.

Sa imbestigasyon sa kapulisan sa Buhangin Police Station walay nakitang foul play sa hitabo.