KORONADAL CITY -- Gikasubo ni South Cotabato Governor Reynaldo Tamayo Jr. human nagpositibo sa coronavirus disease (Covid-19) ang 7 anyos niyang anak.

Matud sa gobernador nga kinahanglan niya nga unongan ang anak sa isolation facility gumikan "immunocompromised" o hinay ang immune system sa iyang asawa.

Giklaro ni Tamayo Jr. nga bisan og negatibo siya sa kagaw, apan kinahanglan niyang mosakripisyo tungod ug alang sa iyang pinalangga nga anak ug pamilya.

Gibutyag sa gobernador nga nakuha sa iyang anak ang kagaw sa ila mismong trabahante nga sagad maoy magdula-dula kaniya.

Hinuon, gitin-aw niya nga normal niyang gihimo ang gimbuhaton sa Governor's Office pinaagi sa pagmonitor niini bisan pa og anaa siya sulod sa isolation facility aron maseguro hapsay ang serbisyo ngadto sa katawhan sa probinsiya.

Ang pagka-Covid sa iyang anak maoy usa ka hinungdan kon nganong iyang gioktaba ang iyang State of the Province Address niadtong Disyembre 16, 2020.