USA ka makuti ug lawom nga imbestigasyon ang gihimo karon sa Maragusan Municipal Police Station labot sa kamatayon sa usa ka Grade 8 student kinsa napalgang patay daplin sa kalsada sa Dole Banana Plantation sa Purok Palmera, Barangay New Katipunan, Maragusan, Compostela Valley Province niadtong Huwebes, Disyembre 19.

Ang biktima nailhang si Leni Hoylar, 13, Grade 8 student sa Maragusan National High School ug residente sa GK Village, Barangay New Katipunan, Maragusan, Comval.

Saysay sa inahan sa biktima nga alas 7 sa gabii niadtong Miyerkules, Disyembre 18, nakuyawan na sila dihang wala na kauli ang biktima sa ilang balay.

Alas 11 sa buntag pagkaugma, napalgan na lang ang patay nga lawas sa biktima nga nagbuy-od sa kasagbutan kilid sa kalsada sa Dole Banana Plantation sa Purok Palmera, Barangay New Katipunan.

Ang biktima nagkadugo diin dunay mga dinukdukan sa bato sa ulo nga maoy hinungdan sa iyang hinanaling kamatayon.

Narekober sab sa kapulisan tupad sa patay nga lawas sa biktima ang duha ka mga dagkong bato nga maoy gituohang gigamit sa pagdukdok sa ulo gumikan nabulit kini’g dugo.

Gihulat sab sa kapulisan ang paggawas sa resulta sa medico legal sa pagsubay ug pagsuta kon nalugos ba ang biktima, sanglit nakita nga dunay lama sa kinatawo niini nga gituohang gilugos una kini gipatay.

Duna nay ginasubay nga mga persons of interest ang kapulisan sa maong hitabo. (Jeepy P. Compio)