TACURONG CITY -- Anaa na sa mga kamot sa awtoridad ang “gunman” nga maoy mipusil patay sa sakop sa media sa siyudad niadtong Oktubre 30.

Ang pagkasikop sa suspek gikompirma mismo sa pamilya sa biktima nga si Benjie Caballero, station manager sa Radyo ni Juan sa dakbayan ug maoy presidente sa Sultan Kudarat Provincial Task Force on Media Security.

Positibo nga gitudlo sa mga testigo ang wala pa hinganli nga “gunman” nga maoy nipusil ni Caballero makalima ka higayon.

Nasayran nga usa ka bulan nga nag-antus si Benjie sa nahiagoma niini nga grabeng samad sa lawas sulod sa intensive care unit sa Saint Louis Hospital sa dakbayan.

Gani gibalhin pa ang biktima sa iyang pamilya ngadto sa Southern Philippines Medical Center sa Davao City.

Apan wala na makaya ni Caballero ang iyang duha ka samad pinusilan sa baga nga maoy hinungdan sa iyang kamatayon.

Kahinumdoman nga nag-atang lang og traysikel ang biktima atbang sa iyang balay sa dakbayan sa Tacurong apan kalit giduol og duha ka wala mailhing lalaki ug gipusil gamit ang kalibre .45 nga pistola ug dayong sibat.

Gilubong sab dayon sa pamilya ang patay nga lawas ni Caballero subay sa tradisyong Islam sa Barangay Inas, M’lang, North Cotabato duol sa ilang pinuy-anan. (Edgar E. Fuerzas)