SA PRISOHAN na mag-uban ang usa ka housemaid ug drayber human sila masikop sa kapulisan sa Ecoland Police Station atol sa buy-bust operation alas 8:10 sa gabii, Enero 24, 2021, sa Barangay Maa, Davao City.

Mga dinakpan giila sa kapulisan nga sila alyas Sandra, 32, ug usa ka Michael Rone Cabilao Escopete, 30, drayber, pulos taga Barangay Leon Garcia, Agdao District ning siyudad.

Nakuha sa posisyon sa mga dinakpan ang usa ka pakite sa gituohang shabu nga motimbang og 4-gramos nga dunay street value nga P66,000, smartphone, ug kuwarta ug marked money.

Depensa sa mga dinakpan gisugo lamang sila sa pagpabaligya gumikan sa kagamay lamang sa ilang suweldo isip housemaid ug drayber sa usa ka pamilya.

Giandam na sa kapulisan ang kasong pagsupak sa Republic Act 9165 kun Comprehensive Dangerous Drugs Act of 2002 nga ipasaka batok sa mga suspek didto sa korte. (Jeepy P. Compio)