NORTH UPI, Maguindanao -- Grupo sa Bangsamoro Islamic Freedom Fighters (BIFF) ang gitudlo nga maoy nananum og improvised explosive device (IED) sa daplin sa highway alas 8:00 sa buntag niadtong Lunes, Enero 6, 2020.

Sa taho gikan sa kapulisan, nasayran nga mismo ang mga sibilyan ang nagpaabot og impormasyon sa bomba nga ilang nakit-an kilid sa National Highway sa North Upi sa nahisgutang probinsiya.

Abtik dayon nga nagresponde ang puwersa sa militar, uban ang North Upi Municipal Police Station (MPS) ug gisirado dayon ang kalsada samtang gihulat ang mga sakop sa Explosive Ordnance and Disposal Team sa Philippine Army aron nga modepyus niini.

Gihulagway nga ang IED dunay mga pulbura, blasting cap, mga lansang ug cellphone isip triggering mechanism.

Kahinumdoman nga una ang kasaulogan sa Bag-ong Tuig, dunay nibusikad nga bomba daplin sa kalsada sa North Upi kon diin duha ka tawo ang naangol.

Gisundan sab kini sa pagpang-itsa og granada sa North Upi MPS apan suwerte nga wala makabuto.

Gihugtan pa sa militar ug kapulisan ang pagbantay sa North Upi batok sa dautang plano sa mga kaaway sa gobyerno. (Edgar E. Fuerzas)