CARMEN, Davao Del Norte -- Samdan ang usa ka inahan ug ang duha niya ka mga anak human sila gipangtigbas sa ilang silingan didto sa Purok 1, Barangay Anibongan, Carmen alas 5 sa hapon, Sabado, Hulyo 18, 2020.

Ang mga biktima mao sila Christine Fatima Camo Olea, 30, ug mga anak nga sila Krisha Jean, 12, ug Paul Francis, 5.

Subay sa report, ang mga biktima padulong nga manihapon sulod sa ilang balay kauban ang mga bisita dihang miabot ang silingan nga ginganlan og Michael Lagang Trion, alyas Tata, 36, minyo, kinsa nagbitbit og 24-pulgadas nga sundang diin sa way daghang istorya gipangtigbas ang mag-inahan.

Sa gihimong pakighinabi sa Sunstar Superbalita kang Police Senior Master Sergent Patricio Libuon, investigator sa Carmen Municipal Police Station, gibutyag sa opisyal nga ang daan nga bikil tali sa suspek ug sa biktima maoy hinungdan sa krimen.

Matud pa nga wa magmalampuson ang suspek sanglit ang mga bisita sa biktima maoy mitabang kanila sa pagsanta sa dautang himuon unta sa suspek.

Ang inahan nga si Cristine nasamdan sa iyang kamot samtang ang duha niini ka mga anak parehong nasamdan sa kamot ug bukton apan, anaa na sa luwas nga kahimtang.

Sa kasamtangan ang suspek nadakpan sa mga miresponde nga mga pulis kinsa gikustodiya na karon sa Carmen Municipal Police Station samtang gihikay ang tukmang kasong ipahamtang batok kaniya didto sa korte.