JAS, Davao Occidental -- Gipasigarbo karon sa lokal nga gobyerno ning lugar ang istatwa sa "Christ the Redeemer" human gipabarog nga adunay 35 ka tiil ang gitas-on diin natukod sa Joyce's Paradise sa Barangay Culaman.

Sumala ni Mayor John Jason Joyce nga gituyo nga kolor brown ang maong istatwa isip pagsimbolo sa mga Indigenous Peoples (IPs) nga mga tribung Manobo ug B'laan sa ilang lugar.

Matod sa mayor nga usa ka konsepto sa iyang amahan nga si kanhi Mayor Jimmy Joyce ang maong istatwa.

"This is a humble project of my father, former Mayor Jimmy Joyce. Our B'laan/Manobo-inspired statue is invading Davao Region," sa post sa mayor sa iyang Facebook account.

Nakadayeg sab ang mga molupyo sa lugar sa imahe ni Hesukristo sanglit kaparehas ang hulagway niini sa Rio de Janeiro sa nasud Brazil.

Naglaum ang mayor nga makatabang kini sa pag-promotar sa ilang turismo tungod sa perfect view sa lungsod.

Apan, pinaagi sa maong istatwa makatabang sab kini nga mo-ampo ang katawhan sa ilang lugar nga hingpit ng mawagtang ang pandemya sa Covid-19 ug wa'y matakbuyan sa ilang mga molupyo. (Orlando B. Dinoy)