NAA sab sa usa ka veterinary clinic sa Davao City ang iring ni Barangay 9-A Kapitan Tata Llubit kay naigo pod kini sa tiil atol sa pagpamusil.

Sa post sa OneMindanao sa GMA nasayran nga putlon na lang ang tiil sa babayeng iring kay di na kini puwede ma-surgery.

Ang maong iring ang ulahing gipakaon ni Kap. Llubit una kini gipusil-patay sa wa pa mailhing mga mamumuno, gabii sa Mayo 25, 2021 didto sa iyang panimalay sa Muslim Village, Brgy. 9-A, Davao City.

Sa Facebook post sa Animal Rescue Rehabilitation & Fostering ARRF - Davao Inc., giingong nahuman na ang X-ray ngadto sa iring.

Nalimpyuhan na sab ang iyang samad diin i-tsek na sab ang iyang dugo, ug functions sa iyang kidney diin i-iskedyul sab ang pagputol sa iyang usa ka tiil nga maoy nagrabehan sa hitabo.

Kung makahatag lang og pahayag ang hayop sa kinsa ang mipusil sa iyang agalon, hagbay rang nasulbad ang krimen.