UNOM ka mga menor de edad ug usa ka buntis ang naglangkob sa 18 ka mga samaron sa Sultan Kudarat bombing alas 3 sa hapon Miyerkules, Abril 3, subay sa report.

Mibusikad ang usa ka bomba atubangan sa usa ka restawran sa national highway sa Isulan, Sultan Kudarat.

Sumala ni Major Arvin Encinas, ang spokesperson sa 6th Infantry (Kampilan) Division, nga usa ka improvised explosive device (IED) ang mibuto sa Carlito’s Place Restaurant sa Barangay Calawag.

Subay sa report sa Municipal Disaster Risk Reduction Management Council (MDDRMC) sa Isulan, gikan alas 5:19 sa hapon anaa na sa 18 ang samaron nga gidali pagdala sa pinakaduol nga balay tambalanan.

Wala pa ma-establisar sa otoridad unsay ugat-hinungdan sa pagpabusikad nga maoy ilang padayon nga giimbestigahan ning kasamtangan.

Wala sab giwala sa otoridad ang daesh-inspired terrorist group Bangsamoro Islamic Freedom Fighters (BIFF) nga maoy posibleng responsable sa hitabo. (Juliet C. Revita/Edgar E. Fuerzas)