KIDAPAWAN CITY -- Gipailawom na sa preemptive lockdown ang Kabacan, North Cotabato sugod Lunes, Marso 30.

Matud ni Kabacan Mayor Herlo Guzman Jr. nga hugtanon nila nga ipatuman ang preemptive lockdown sa mga utlanan sa lungsod ilabina sa Maguindanao.

Ang mga barangay nga anaa sa preemptive lockdown ang gilangkuban sa Sitio Malabuaya ug Sitio Lumayong, Barangay Kayaga, Magatos, Bangilan, Malamote, Cuyapon, Katidtuan, Sanggadong ug Simone.

Ang preemptive lockdown ang kabahin sa Executive Order (EO) 2020-018 nga gipagawaas ni Mayor Herlo Guzman Jr. aron palig-unon pa ang kampanya batok sa hulga sa coronavirus disease (Covid-19).

Ang Kabacan dunay unom ka mga person under monitoring (PUM) ug upat nga patient under investigation (PUI) nga naka home quarantine.

Padayon sab ang pang-apud-apod og hinabang sa LGU-Kabacan sa mga pinaka pobre nga pamilya nga naapektuhan sa public health crisis sa nasud.

Gipasalamatan sab ni Mayor Guzman Jr. ang mga tawo nga dunay malumong kasing-kasing nga nanghatag og pagkaon apil na mga personal protective equipment sa mga frontliners. (Edgar Fuerzas)