MATI CITY, Davao Oriental -- Daw gimingaw na sab sa prisohan ang usa ka 42-anyos nga lalaki kinsa kanhi piniriso ug karon nasikop na sab atol sa buy-bust operation sa Philippine Drug Enforcement Agency (PDEA)-Davao ug sa Mati City Police Station alas 11:30 sa buntag didto sa Magsaysay 17-2, Barangay Central.

Giila sa kapulisan ang suspek nga si Rolly Castillo Cagusan alyas Ole, minyo ug usa ka Provincial Target Listed Drug Personality No. 7 ug residente sa maong dapit.

Giingong dugay nang gipanubayan sa awtoridad ang ilegal nga lihok sa suspek hangtud nga mikubit kini sa nagtakuban nga pulis nga mopalit og shabu.

Atol sa transaksiyon, daling giposasan ang suspek ug nakuha sa posisyon niini ang tulo ka pakite sa gituohang shabu ug marked money.

Niadtong Pebrero 2009 nadakpan sab ang suspek ug nakagawas sa prisohan Enero 2020 sa kalapasan sa susamang salaud. (Jeepy P. Compio)