DAVAO DEL SUR -- Kapin 800 na ka mga bakwit ang nangasakit sa nagkadaiyang evacuation center sa tulo ka mga dapit sa lalawigan.

Gumikan niini miabiso na ang Department of Health (DOH) nga tambalan ang mga pasyente ug magbutang gyud og nars sa mga evacuation centers.

Sa datos gikan sa Provincial Health Office (PHO), 524 ang gikalintura, giubo ug sip-on, 123 ang gikalintura lang ug 118 ang mitaas ang blood pressure, gikan sa mga bakwit ning lungsod, Magsaysay ug Digos City.

Daling gipahiling ni Marilou Abing ang iyang 5-anyos nga anak nga si Rixie sa mga health personnel sa Barangay Balnate, Magsaysay, dihang nakasinati kini og hilanat nga sagol ubo ug di sab ganahan mokaon.

Matod sa inahan nga lisod ang ilang kahimtang sa evacuation center kay gawas nga daling motakod ang sakit, magpuli-puli sab sa ilang pamilya.

Ang bana ni Marilou, mitaas sab ang dugo mao nga gihiling dayon sa mga nars.

Tungod niini, gidasig sa mga personahe sa panglawas ang matag lokal nga gobyerno nga mopahigayon og supplemental feeding ilabi pa sa mga bata nga di himsog ang lawas. (Orlando B. Dinoy)