NAKATAKDA nang ipakatag sa Davao City Police Office (DCPO) ang ilang mga sakop pipila ka adlaw una magsugod ang Pasko Fiesta sa Davao karong Nobyembre 23, 2018.

Atol sa AFP-PNP press conference sa The Mandaya Hotel Miyerkules, Nobyembre 14, gibutyag ni DCPO spokesperson Senior Inspector Ma. Teresita Plaza-Gaspan nga nakaandam na ang plano alang sa seguridad sa aktibidad.

“Naka-ready na ang atong mga sakop sa DCPO, ug kung kinahanglanon pa kita og mga pulis, dali lang kitang maka-request sa region alang sa augmentation,” sulti ni Gaspan.

Ning kasamtangan, gisugdan na ang pagpakusog sa seguridad sa mga lugar diin asa sagad magtapok ang mga tawo, sama na lamang sa night market sa Roxas Avenue, mga plaza, simbahan ug mga malls.

Nagpabilin gihapon nga anaa sa full alert ang status sa seguridad sa tibuok rehiyon. (Richy Nalagon)