DAVAO DE ORO -- Hot pursuit operation ang gilusad sa Maragusan Municipal Police Station aron madakpan ang suspek nga miluba sa iyang karibal sa gugma didto sa Purok Macapagal, Barangay New Albay, Maragusan alas 10:00 sa buntag, Sabado.

Ang biktima giila nga si Johny Vertudazo, 22, molupyo sa Purok Magsaysay, Barangay New Albay.

Base sa inisyal nga imbestigasyon, nasayran nga ang biktima ug ang suspek nga ginganlan og Romel Dolorican alyas Dodong, 22, taga Purok Pag-asa, Barangay Tagugpo, Pantukan, nagkalalis gumikan sa ilang "love affair" sa babaye nga ginganlan og Merrycho Mamanao.

Ang panaglalis misampot sa pagluba sa suspek sa biktima gamit ang mahait nga hinagiban tumong sa walang bahin sa kilid sa tiyan.

Human sa pagpanunggab, ang suspek daling nilakaw nga paingon sa wala masayring direksiyon.

Ang biktima gidali pagdala ngadto sa Davao De Oro Provincial Hospital-Maragusan aron matambalan.