Gipahibalo sa Mati City, Davao Oriental nga hinay-hinay nang nagkaubos ang kaso sa Covid-19 sa siyudad.

Sumala sa Mati City Information Office nga bisan sa mga health facilities, miubos na usab ang mga pasyenteng dunay Covid-19.

Sa kasamtangan, 48 na lamang ang pasyente sa Alternate Care Site sa Milagrosa; 60 ang sa Davao Oriental Provincial Medical Center; 8 sa St. Camillus Hospital; 10 sa Tagum City Hospitals; ug 223 sa mga panimalay ubos sa granular lockdown.

Kini usa ka sumbanan subay sa ginapatuman nga granular lockdown nga maoy usa sa mga nakatabang aron sa pagpakgang sa pagkuyanap sa Covid-19 sa komunidad.

Apan pahimangno gihapon ang awtoridad sa Mati ngadto sa mga lumulopyo nga magpabilin lamang gihapon nga mosunod sa mga health protocols tungod dako kining tabang sa pagbatok kontra Covid-19. (Jeepy P. Compio/Mati City Information Office)