GINASUBAY pa sa kapulisan unsay hinungdan sa pagpatay sa usa ka lalaki nga napalgan sa daplin sa baybayon sa Clenergy Park, Dumalag 3, Barangay Matina Aplaya, Davao City alas 2:40 sa hapon Biyernes, Hunyo 15.

Sumala ni Chief Inspector Ronald Lao, hepe sa Talomo Police Station, nga padayon silang naghimo og imbestigasyon sa hitabo gumikan ilang nakita nga dunay lawom nga hinungdan ang pagpatay sanglit gibaatan og packaging tape ang nawong niini ug gihigtan ang duha ka kamot.

Subay sa sketchy report gikan kang Lao, usa ka Larry Guardario ang nagpahibalo sa iyang mga silingan nga dunay patay daplin sa baybay hinungdan nga napahibalo ang Talomo Police Station.

Ang patay nga lawas nakasuot og itom nga t-shirt nga dunay nakasulat nga "I love Davao" ug naka-checkered og short pants kolor gray ug itom diin gituohan sa kapulisan nga gisalbids ang biktima.

"Ginasubay pa nato kung unsay record aning biktima," ingon ni Lao.

Wala sab mihatag og komento si Lao sa mga nanggawas nga istorya nga pulis ang nagpatay niini human dunay usa ka post sa social media nga Facebook diin gipakita nga giposasan ang biktima sa usa ka lalaki nga nakasuot og jersy dunay marka sa kapulisan.

Sa FB post ni Radny Pontillo Canoy, iyang gipakita ang hulagaway nga buhi pa ang suspek nga gigunitan sa giingong pulis nga lalaki ug mihaum ang suot didto sa patay nga lawas daplin sa baybayon.

Sa mga komento, giingong kawatan, tigpamatay, hold-upper ug pusher ang

biktima apan wala kini gikompirma sa kapulisan sa Talomo hinungdan nga padayon nila kining gihimoan og lawom nga imbestigasyon.

Sa kasamtangan, ang patay nga lawas sa biktima gidala sa Angel Funeral Homes sa F. Torres Street ning siyudad.