PADAYON ang imbestigasyon sa kapulisan bahin sa pagpusil patay sa usa ka beautician nga sakop sa lesbian, gay, bisexual and transgender (LGBT) alas 2:30 sa hapon, Huwebes, Abril 22 sa Midsayap, North Cotabato.

Giila ang biktima nga si Eric Sarte Sandaga, 41, nagpuyo sa Barangay Bagumba sa nahisgutang lungsod.

Sumala kang North Cotabato Provincial Police Office Director Colonel Henry Villar nga sakay sa iyang motorsiklo si Sandaga didto sa utlanan sa Barangay Baliki sa Midsayap ug Barangay Dungguan sa Aleosan sa nahisgutang probinsiya.

Apan kalit lang duha ka wala mailhing tawo ang mibutho ug namusil kaniya tumong sa ulo ug likod nga bahin sa lawas.

Human sa hitabo, misibat sab dayon ang mga suspek paingon sa hilit nga dapit sa Aleosan sakay og motorsiklo.

Nasayran nga sa wala pa mahitabo ang pagpusil, dunay gikalalis ang biktima nga binabaye usab gumikan sa selos sa ulitawo nga pulos nila ka-relasyon.

Hinuon kapulisan sa Midsayap Municipal Police Station (MPS) ug Aleosan MPS nangalap pa og dugang mga impormasyon aron nga matumbok ang tinuod nga motibo sa pagpatay sa biktima.