PADAYON ang gihimong pagpanubay sa kapulisan sa Santo Tomas Municipal Police Station ug mismong sa Munisipalidad sa Santo Tomas sa Davao del Norte sa giingong mga “kulto” nga dunay mga hinagiban nga manuktok sa pultahan sa mga balay sa dapit.

Sa pakighinabi kang Santo Tomas Municipal Information Officer Mart Sambalud, giingong nakadawat sila og report sa alegasyong mga kulto sa dapit.

Giingong dunay natigayong pagpanghasi sa gituohang mga kulto didto sa Purok 6, Barangay Pantaron, Santo Tomas, Davao del Norte.

Sumala ni Sambalud nga ang Santo Tomas Municipal Police Station (MPS) padayong mihimo og pagpanubay sa gikatahong mga miyembro sa kulto nga giingong nagsuroy-suroy matag gabii kinsa alegasyong mopatay sa bisan kinsang makita labi na og abli ang balay.

"We could not confirm, as of the moment, if such rumor is true but what the Santo Tomas PNP [Philippine National Police] is doing is to gather initial information and vet this information so that an appropriate action would be taken by the police," ingon ni Sambalud nga nahinabi sa SunStar Davao Lunes, Abril 12.

Gipahimangnoan sa opisyal ang katawhan sa dapit nga gilayong mo-report sa kapulisan ugaling dunay mamatikdan nga kadudahang lihok sa tawo nga di pamilyar sa dapit.

"Whether such report is real or not, we are urging the public to be vigilant at all times. Please report to your respective Punong Barangays if there are threats made by unknown individuals especially at night," ni Sambalud.

Dugang ni Sambalud ngadto sa publiko nga magpundo lamang sa balay ug di magpataka og abli sa pultahan labi na kung gabii, mas maayong tan-awon una kinsa ang nanuktok.

Didto sab sa Misamis Occidental, nabalot sa kahadlok ang kagabhion sa mga nanimuyo sa pipila ka dapit tungod sab sa giingong kulto nga suma pa nagapanuktok og panimalay, ug giingong mopatay.

Gisaysay sa mga nakasinati sa pagpanuktok nga ang mga manuktukay sagad manghuraw mga tagtungang gabii, diin gibutyag nga sila dunay gahum nga di katingog o makapaghot ang iro sa tagbalay nga ilang tuktukon.

Luyo niini, may kapasidad sab sila suma pa nga sundugon ang tingog sa kabanay sa tagbalay.

Nagbitbit sab kini og mga telang puti nga may ni-Latin nga pinulungan.