DIGOS CITY -- Natiklo sa mga sakop sa Digos City Police Office (DCPO) ang notadong Top 10 most wanted sa dakbayan, alas 4:50 sa hapon, Biyernes, Enero 24.

Mga operatiba sa DCPO, kuyog ang warrant ug intelligence personnels mao ang misilbi sa orden de aresto ngadto sa suspek nga si Dave dela Cerna Modejar, alyas “Noniboy”, 24-anyos, laborer nga molupyo sa Chapter 7, Barangay Aplaya.

Sumala ni Police Major Rey Santillan, officer-in-charge sa DCPO, nga nasikop ang suspek sa pinuy-anan niini human giatubang ang kasong paglapas sa Acts of Lasciviousness in Relation to Republic Act 7610 kun the Anti-Child Abuse Act.

Gipaguwa sa Regional Trial Court (RTC), Branch 19 ang warrant of arrest nga gilagdaan ni Executive Judge Carmelita Sarno-Davin.

Anaa na sa kustodiya sa DCPO ang suspek apan mahimong makaangkon sa temporaryong kagawasan ugaling makapyansa sa korte sa kantidad P80,000.

Pahibaw-on sab sa kapulisan ang korte nga nasikop na kini alang sa pagpaguwa sa commitment order. (Orlando B. Dinoy)